ᐊᐱᖅᑯᑕᐅᒐᔪᒃᑐᑦ

ᓄᓇᕗᒻᒥ ᒥᕐᖑᐃᖅᓯᕖᑦ ᐊᓕᐊᓇᐃᒋᓛᕆᕙᕗᑦ ᐃᖃᓪᓕᐊᕐᕕᐅᓪᓗᑎᒃ ᐊᐅᓪᓛᕐᕕᐅᓪᓗᑎᒡᓗ, ᓄᓂᕙᒋᐊᕐᕕᐅᓪᓗᑎᒃ, ᐅᒥᐊᖅᑐᕐᕕᐅᓪᓗᑎᒃ ᐅᕝᕙᓘᓐᓃᑦ ᑏᑐᕆᐊᖅᑐᖅᖢᑎᒃ. ᑰᑦ ᐊᒻᒪ ᐱᓱᒡᕕᐅᔪᑦ ᐃᖏᕐᕋᖃᑦᑕᖅᓯᒪᔪᑦ ᑕᐅᓴᖏᓐᓃᑦᑐᓂᒃ ᐊᕐᕌᒍᓂᒃ ᐊᒻᒪ ᓯᕗᓕᕕᓂᕗᑦ 1000-ᖏᓐᓃᓚᐅᖅᓯᒪᔪᑦ. ᐃᓂᒋᔭᐅᑐᐃᓐᓇᕆᐊᓖᑦ ᐊᔾᔨᖃᙱᑦᑐᓂᒃ ᓄᓇᒥᙶᖅᑐᓂᒃ, ᐅᕝᕙᓘᓐᓃᑦ ᐱᕈᖅᑐᓂᒃ ᐱᕈᕐᕕᐅᓲᓂᒃ ᐊᒻᒪ ᐆᒪᔪᓂᒃ ᓂᕆᕝᕕᐅᓲᓂᒃ, ᑎᓯᓂᒃ ᐅᕝᕙᓘᓐᓃᑦ ᐊᐅᓪᓚᕐᕕᐅᓲᓂᒃ. ᐅᐸᒐᐅᑐᐃᓐᓇᕆᐊᖃᕐᒥᔪᑦ ᓴᖅᑭᔮᖅᑎᑦᑎᓂᕐᒧᑦ ᐳᓚᕋᑦᑎᓄᑦ ᐅᐸᑦᑕᐅᒍᒪᔪᓂᑦ.

ᓄᓇᕗᒻᒥ ᒥᕐᖑᐃᖅᓯᕖᑦ "ᓄᓇᑦᑎᐊᕙᐅᓪᓗᑎᒃ" ᑐᑭᖃᖅᖢᓂ ᐅᕙᑦᑎᓐᓄᑦ, ᑐᕌᒐᕆᔭᑦᑎᓐᓄᑦ ᐊᒃᑐᐊᓂᖃᖅᖢᓂ ᐊᒻᒪ ᐱᓕᕆᖃᑕᐅᔪᒪᓕᒃᑲᓐᓂᖅᖢᑎᒃ ᓄᓇᕗᒻᒥ ᐃᓕᖅᑯᓯᑦᑎᓐᓂ ᐊᒻᒪ ᐅᔾᔨᕆᔭᐅᓕᒃᑲᓐᓂᕐᓗᓂ ᓄᓇᑦᑎᓐᓂ. ᓄᓇᕗᒻᒥ ᒥᕐᖑᐃᖅᓯᕕᕗᑦ ᑲᑐᔾᔨᖃᑎᒌᒍᑕᐅᓪᓗᑎᒃ ᐸᕐᓇᒃᑕᐅᓲᖑᕗᑦ ᐊᐅᓚᑕᐅᓪᓗᑎᒡᓗ ᐃᓄᖕᓄᑦ ᐊᒻᒪ ᓄᓇᕗᑦ ᒐᕙᒪᒃᑯᓐᓄᑦ, ᐱᓕᕆᖃᑎᒋᓗᒋᑦ ᐊᒃᑐᖅᑕᐅᓯᒪᔪᑦ ᓄᓇᓖᑦ.

ᓄᓇᕗᒻᒥ ᒥᕐᖑᐃᖅᓯᕖᑦ ᐋᖅᑭᒃᑕᐅᓲᖑᕗᑦ ᓄᓇᕗᑦ ᒐᕙᒪᒃᑯᓐᓄᑦ ᓴᐳᔾᔨᔾᔪᑕᐅᓇᓱᒃᖢᑎᒃ ᓄᓇᐅᑉ ᑕᐅᑦᑐᐊᓄᑦ ᐊᒻᒪ ᓄᓇᓄᑦ ᐱᒻᒪᕆᐅᒋᔭᐅᔪᓄᑦ ᐃᓄᖕᓄᑦ ᐊᒻᒪ ᓄᓇᕗᒥᐅᓄᑦ. ᓄᓇᕗᒻᒥ ᒥᕐᖑᐃᖅᓯᕐᕖᑦ ᑲᑐᔾᔭᐅᓪᓗᑎᒃ ᐸᕐᓇᒃᑕᐅᓯᒪᕗᑦ ᐊᐅᓚᑕᐅᓪᓗᑎᒡᓗ ᓄᓇᕗᑦ ᒐᕙᒪᒃᑯᑦ ᐊᕙᑎᓕᕆᔨᒃᑯᖏᓐᓄᑦ, ᓄᓇᕗᒻᒥ ᒥᕐᖑᐃᖅᓯᕐᕖᑦ ᐱᓐᓇᕆᔭᐅᔪᓪᓗ ᓄᓇᖃᕐᕖᑦ ᐱᓕᕆᕝᕕᖓᓐᓄᑦ, ᐊᒻᒪ ᓄᓇᓕᖕᓂ ᑲᑐᔾᔨᓪᓗᑎᒃ ᐸᕐᓇᐃᔩᑦ ᐊᐅᓚᑦᑎᔩᓪᓗ ᑲᑎᒪᔨᕋᓛᖏᓐᓄᑦ ᓄᓇᓕᖕᓂ ᐊᒃᑐᐊᓂᓕᖕᓄᑦ ᑕᒪᐃᓐᓄᑦ ᒥᕐᖑᐃᖅᓯᕕᖕᓄᑦ. ᓄᓇᕗᒻᒥ ᑲᑐᔾᔨᓪᓗᑎᒃ ᐸᕐᓇᐃᓂᕐᒧᑦ ᐊᐅᓚᑦᑎᓂᕐᒧᓪᓗ ᑲᑎᒪᔨᕋᓛᓄᑦ ᓄᓇᕘᓕᒫᒥ ᐅᖃᐅᔾᔪᐃᖃᑦᑕᖅᐳᑦ ᐸᕐᓇᐃᓂᕐᒧᑦ ᐊᐅᓚᑦᑎᓂᕐᒧᓪᓗ ᓄᓇᕗᒻᒥ ᒥᕐᙳᐃᖅᓯᕐᕕᖕᓄᑦ ᐱᓕᕆᐊᒃᓴᓂᒃ.

ᑲᓇᑕᒥ ᒥᕐᖑᐃᖅᓯᕐᕕᒃ ᓴᐳᔾᔭᐅᓯᒪᑦᑎᐊᖅᑐᖅ ᐊᐅᓚᑕᐅᓪᓗᓂᓗ ᑲᓇᑕᒥ ᒐᕙᒪᒃᑯᓐᓄᑦ. ᒐᕙᒪᑐᖃᒃᑯᑦ ᐋᖅᑭᒃᓯᕗᑦ ᑲᓇᑕᓕᒫᒥ ᒥᕐᙳᐃᖅᓯᕐᕕᖕᓂᒃ ᓇᐅᒃᑯᓕᒫᖅ ᐃᓂᓂ ᑕᒪᒃᑯᐊ ᐳᓛᕆᐊᖅᐸᒃᑐᑦ ᐊᑐᖃᑦᑕᕐᓂᐊᕐᒪᑕ ᐊᔾᔨᒌᙱᕈᓘᔭᖅᑐᓂᒃ ᓄᓇᓂᒃ ᑲᓇᑕᒥ. ᑲᓇᑕᓕᒫᒥ ᒥᕐᙳᐃᖅᓯᕐᕕᓕᕆᔩᑦ ᓄᓇᕗᒻᒥ ᐊᐅᓚᑕᐅᕗᑦ ᒥᕐᙳᐃᖅᓯᕐᕕᓕᕆᔩᑦ ᑲᓇᑕᒥ ᐊᒻᒪᓗ ᑲᑐᔾᔨᓪᓗᑎᒃ ᒥᕐᙳᐃᖅᓯᕐᕕᖕᓄᑦ ᐊᐅᓚᑦᑎᕝᕕᖃᕐᓂᕐᒧᑦ ᑲᑎᒪᔨᕋᓛᓂᒃ ᑕᒪᐃᓐᓄᑦ ᐊᑐᓂᑦ ᒥᕐᙳᐃᖅᓯᕐᕕᖕᓄᑦ.

ᐃᓄᐃᑦ ᐊᖑᓇᓱᒍᓐᓇᐅᑎᖏᑦ ᓄᓇᕗᒻᒥ ᒥᕐᖑᐃᖅᓯᕐᕕᒻᒥ ᓴᐳᑎᔭᐅᓯᒪᔪᑦ ᓄᓇᕗᒻᒥ ᐊᖏᕈᑎᒧᑦ (NA) ᐊᒻᒪᓗ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎ ᓄᓇᕗᒻᒥ ᒥᕐᖑᐃᖅᓯᕐᕕᓐᓄᑦ ᓄᓇᕗᒻᒥ ᓄᓇᓕᖃᕐᕕᐅᔪᓂᑦ (IIBA): ᐊᖑᓇᓱᓐᓂᖅ.

NA−ᑯᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪᓗ ᐊᖏᖃᑎᒌᒍᑎᑦ ᓴᐳᔾᔨᓯᒪᕗᑦ ᐱᔪᓐᓇᐅᑎᖏᓐᓂᒃ ᐃᓄᐃᑦ ᓄᓇᒥᒃ ᐊᑐᖅᑕᐅᖏᓐᓇᕈᓐᓇᖁᓪᓗᒋᑦ ᐊᖑᓇᓱᖕᓂᕐᒧᑦ ᐱᓕᕆᐊᖑᕙᒃᑐᓄᑦ, ᓄᓇᓕᕋᓛᖃᕐᕕᖕᓄᑦ, ᐃᒡᓗᕋᓛᓄᑦ, ᓴᓇᙳᐊᒐᒃᓴᓄᑦ, ᐃᓯᕈᓐᓇᕐᓂᕐᒧᑦ, ᐊᓯᖏᓐᓄᓪᓗ ᐱᔾᔪᑕᐅᔪᓄᑦ ᑲᑕᓐᓂᓕᒃ ᒥᕐᙳᐃᖅᓯᕐᕕᖕᒥ.

ᒥᕐᙳᐃᖅᓯᕐᕕᖕᒥᒃ ᐊᐅᓚᑦᑎᓂᕐᒧᑦ ᐱᕙᒌᔭᖅᑕᐅᓯᒪᔪᖅ ᓇᓗᙱᑦᑎᐊᕈᑕᐅᓂᐊᖅᐳᖅ ᑕᒪᒃᑯᐊ ᐳᓛᕆᐊᖅᑐᑦ ᐊᑐᖅᐸᖕᓂᖏᑦ ᐱᕙᓪᓕᐊᓂᖏᓪᓗ ᐊᑭᕋᖅᑐᙱᒃᑲᓗᐊᕐᒪᖔᑕ ᐃᓄᐃᑦ ᐊᑐᖅᐸᖕᓂᖏᓐᓄᑦ ᖁᕕᐊᒋᔭᖃᖅᐸᖕᓂᖏᓐᓄᓪᓗ ᒥᕐᙳᐃᖅᓯᕐᕕᐅᑉ.

ᐊᓯᔾᔨᒋᐊᒐᒃᓴᐅᔪᖅ ᐊᐅᓚᑦᑎᓂᕐᒧᑦ ᐱᕙᒌᔭᖅᑕᐅᓯᒪᔪᖅ ᐱᔭᕆᐊᖃᖅᐳᖅ ᓴᐳᔾᔨᓯᒪᓂᕐᒥᒃ ᐃᓕᖅᑯᓯᑐᖃᕐᓄᑦ ᐅᔾᔨᕐᓇᕐᓂᒻᒪᕆᖕᓂᒃ ᐃᓂᓂᒃ ᑕᕝᕙᓂ ᒥᕐᙳᐃᖅᓯᕐᕕᖕᒥ ᐃᓚᒋᔭᐅᓪᓗᑎᒃ ᐃᑦᑕᕐᓂᓴᐃᑦ. ᐃᖅᑲᓇᐃᔭᖅᑏᑦ ᓄᓇᕗᒻᒥ ᒥᕐᖑᐃᖅᓯᕐᕕᖕᓄᑦ ᖃᐅᔨᓴᖃᑦᑕᕐᓂᐊᖅᐳᑦ ᐊᐅᓚᑦᑎᕙᒃᖢᑎᒡᓗ ᒥᕐᖑᐃᖅᓯᕐᕕᖕᒥ ᐃᑦᑕᕐᓂᓴᕐᓂᒃ ᐅᖃᐅᔾᔪᖅᓱᖅᑕᐅᕙᒡᓗᑎᒃ ᓄᓇᓕᖕᓂ ᐸᕐᓇᐃᔨᑦ ᐊᐅᓚᑦᑎᔨᓪᓗ ᑲᑎᒪᔨᕋᓛᓄᑦ, ᑕᐃᒪᐃᑦᑕᕆᐊᖃᕌᖓᑕᓗ ᐱᓕᕆᖃᑎᖃᖅᐸᒡᓗᑎᒃ ᐃᓐᓇᕐᓂᒃ ᓄᓇᓕᖕᓂ, ᐃᓕᖅᑯᓯᓕᕆᔨᒃᑯᓐᓂ, ᐊᒻᒪ ᐃᓄᐃᑦ ᐱᖁᑎᖏᓐᓂᒃ ᓇᐅᑦᑎᖅᓱᖅᑎᓂᒃ.

ᐃᑦᑕᕐᓂᓴᖃᕐᕖᑦ ᓱᕋᒃᑐᖃᕐᓂᖅᐸᑕ ᐅᕝᕙᓘᓐᓃᑦ ᐃᑦᑕᕐᓂᓴᐃᑦ ᓇᓂᔭᐅᒃᐸᑕ ᓯᕗᓂᒃᓴᑦᑎᓐᓂ, ᓄᓇᓕᓐᓂᑦ ᑲᑐᔾᔨᓂᒃᑯᑦ ᐱᕙᒌᔭᖃᑎᒌᓐᓂᖅ ᐊᐅᓚᑦᑎᖃᑎᒌᓐᓂᕐᒧᑦ ᑲᑎᒪᔨᕋᓛᖏᑦ ᒪᓕᖕᓂᐊᖅᑐᑦ ᒪᓕᒐᓕᐊᖑᔪᒪᔪᓂᒃ ᐊᑐᐊᒐᕐᓂᓪᓗ, ᐅᖃᐅᔾᔭᐅᔪᒪᓗᑎᒡᓗ ᑖᒃᑯᓇᙵᑦ ᐱᓕᕆᖃᑎᒌᒃᑐᓂᒃ ᒥᒃᖠᒋᐊᖅᑎᑦᑎᔪᒪᓪᓗᑎᒃ ᐊᒃᑐᐃᔾᔪᑕᐅᓲᓂᒃ ᐃᓕᖅᑯᓯᒃᑯᑦ ᐱᔾᔪᑎᒃᓴᓂᒃ. ᐊᐅᓚᑦᓯᓂᕐᒧᐊᖓᔪᑦ ᐃᓚᖃᑐᐃᓐᓇᕆᐊᓖᑦ ᓴᓇᒪᓂᖓ ᓴᐳᔾᔭᐅᓯᒪᖁᓪᓗᒋᑦ ᐃᑦᑕᕐᓂᓴᖃᕐᕖᑦ, ᐃᑦᑕᕐᓂᓴᑦ ᐲᔭᖅᑕᐅᓗᑎᒃ, ᒪᓕᒐᙳᖅᑎᓪᓗᒋᑦ ᐅᕝᕙᓘᓐᓃᑦ ᑭᒡᓕᖃᖅᑎᑕᐅᓗᑎᒃ ᐅᐸᒃᑕᐅᔪᓐᓇᕐᓂᖏᑦ ᐃᑦᑕᕐᓂᓴᖃᕐᕖᑦ, ᐅᕝᕙᓘᓐᓃᑦ ᖃᐅᔨᓴᖅᑎᑦᑎᓗᑎᒃ.

ᐊᓯᔾᔨᒋᐊᒐᒃᓴᐅᔪᖅ ᐊᐅᓚᑦᑎᓂᕐᒧᑦ ᐱᕙᒌᔭᖅᑕᐅᓯᒪᔪᖅ ᐱᑎᑦᑎᕗᖅ ᑕᓯᐅᖅᓯᓂᕐᒥᒃ ᐃᖅᑲᓇᐃᔭᖅᑎᓄᑦ ᒥᕐᙳᐃᖅᓯᕐᕕᖕᒥᓗ ᐊᑐᖅᐸᒃᑐᓄᑦ ᐃᑦᑕᕐᓂᓴᖃᕐᕕᖕᓂᒃ ᐃᑦᑕᕐᓂᓴᓂᒡᓘᓐᓃᑦ ᓇᓂᔭᐅᔪᖃᕆᐊᖃᖅᐳᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ ᒥᕐᙳᐃᖅᓯᕐᕕᖕᓂ: ᓇᓗᙱᑦᑎᐊᖅᑐᖃᕐᓗᓂ ᑕᒪᒃᑯᐊ ᐅᖃᐅᓯᐅᒐᓗᐊᕐᒪᖔᑕ ᓄᓇᕗᑦ ᒐᕙᒪᖓᑕ ᐃᓕᖅᑯᓯᓕᕆᔨᒃᑯᖏᓐᓄᑦ.

ᐃᓕᖅᑯᓯᓕᕆᓂᖅ: ᒥᕐᖑᐃᓯᕐᕕᒃ ᐃᒪᓕᐅᕋᔭᖅᑐᖅ ᓴᐳᔾᔨᓗᓂ ᐊᒻᒪ ᐃᓄᐃᑦ ᓄᓇᑐᖃᖏᓐᓂᒃ ᐱᖁᓯᑐᖃᖏᓐᓂᒃ. ᑖᒃᑯᐊ ᓄᓇᐃᑦ ᐱᒻᒪᕆᐅᓪᓗᑎᒃ ᐃᖅᑲᐃᓯᔾᔪᑕᐅᕗᑦ ᐃᓄᐃᑦ ᐱᐅᓯᑐᖃᖏᓐᓂᒃ ᑕᐃᔅᓱᒪᓂ 1000−ᖏᓐᓃᓚᐅᖅᓯᒪᔪᓂᒃ, ᐊᒻᒪ ᐃᑦᑕᕐᓂᓴᑦ ᐱᔾᔪᑎᒃᓴᑦ ᐊᒻᒪ ᐅᓂᒃᑳᖅᑐᐊᑦ ᐊᒃᑐᐊᓂᓖᑦ ᒥᕐᖑᐃᖅᓯᕐᕕᖕᒧᑦ ᐊᐅᓚᑕᐅᑦᑎᐊᓛᖅᑐᑦ ᑭᖑᕚᒃᓴᑦᑎᓐᓄᑦ. ᐃᓄᐃᑦ ᐃᓕᖅᑯᓯᖏᑦ ᐱᓐᓇᕆᔭᖏᑦ ᖁᕕᐊᓲᑎᒋᔭᐅᓂᐊᖅᐳᑦ ᒥᕐᖑᐃᖅᓯᕐᕕᖕᒥ ᐃᑦᑕᕐᓂᓴᕐᓂᒃ ᐅᐱᒋᔭᖃᕐᓂᕐᒧᑦ ᐸᕐᓇᐅᑎᒃᑯᑦ.

ᓄᓇᒥᖔᖅᑐᖅ: ᓄᓇᕗᒻᒥ ᒥᕐᖑᐃᖅᓯᕖᑦ ᓴᐳᔾᔨᓂᐊᖅᐳᑦ ᐆᒪᔪᑦ ᓇᔪᖅᐸᒃᑕᖏᓐᓂᒃ, ᑲᔾᔮᕐᓇᖅᑐᓂᒃ ᓄᓇᓂᒃ, ᐊᒻᒪ ᐃᓄᐃᑦ ᓄᓇᑐᖃᖏᓐᓂᒃ. ᒥᕐᙳᐃᖅᓯᕐᕕᖕᒥᒃ ᐊᐅᓚᑦᑎᕝᕕᖃᕐᓂᕐᒧᑦ ᐱᕙᒌᔭᖅᑕᐅᓯᒪᔪᖅ ᐃᒪᓐᓇᐅᖁᔨᕗᖅ, ᖃᐅᔨᓴᕐᓂᕐᒥᒃ, ᒪᓕᒋᐊᖃᖅᐸᒃᑐᓂᒃ, ᒥᑭᒡᓕᒋᐊᖅᑎᑦᑎᓂᕐᒥᒡᓗ ᐊᒃᑐᖅᓯᓂᐅᕙᒃᑐᓂᒃ ᐃᓄᖕᓂᑦ ᓄᓇᒥᓗ ᐊᒃᑐᖅᓯᓂᐅᕙᒃᑐᓂᒃ ᐊᕙᑎᒧᑦ.

ᒪᑭᒪᔾᔪᑎᒃᓴᑦ: ᓄᓇᕗᒻᒥ ᒥᕐᖑᐃᖅᓯᕐᕖᑦ ᐱᔪᒥᓴᐃᔪᑦ ᐱᕈᖅᐸᓪᓕᐊᓂᕐᒧᑦ ᐱᕙᓪᓕᐊᓂᕐᒥᒃ ᓇᖕᒥᓂᖃᕐᓂᒃᑯᑦ ᐱᕕᖃᖅᑎᑦᑎᓂᒃᑯᑦ ᐊᒻᒪᓗ ᐃᖅᑲᓇᐃᔮᒃᓴᑎᒍᑦ ᐳᓚᕋᖅᑐᓕᕆᓂᒃᑯᑦ ᐊᒻᒪᓗ ᒥᕐᙳᐃᖅᓯᕕᖕᒥ ᐊᐅᓚᑦᑎᓂᕐᒧᑦ. ᓄᓇᕗᒻᒥ ᒥᕐᖑᐃᖅᓯᕐᕖᑦ ᒪᓂᒪᑎᑦᑎᕗᑦ ᐊᑯᓂᐅᔪᒃᑯᑦ ᐃᖏᕐᕋᐃᓐᓇᕈᓐᓇᖅᑐᓂᒃ ᒪᑭᒪᔾᔪᑎᓄᑦ ᐱᕈᖅᐸᓪᓕᐊᔾᔪᑎᒃᓴᓂᒃ ᓄᓇᓕᖕᓄᑦ ᐱᕈᖅᐸᓪᓕᐊᖁᓪᓗᒋᑦ ᐳᓚᕋᖅᑐᓕᕆᓂᖅ ᐊᒃᑐᐊᓂᓖᑦ ᒥᕐᖑᐃᖅᓯᕐᕕᖕᒧᑦ, ᐊᒻᒪ ᐃᓕᖅᑯᓯᕐᒧᑦ ᐊᒻᒪ ᓇᖕᒥᓂᓕᖕᓄᑦ. ᓯᕗᓂᒃᓴᑦᑎᓐᓂ, ᒥᕐᖑᐃᖅᓯᕕᒃ ᐃᓄᖕᓂᒃ ᑳᓐᑐᓛᒃᑎᑦᑎᖃᑦᑕᓛᖅᑐᑦ ᐊᒻᒪ ᐃᖅᑲᓇᐃᔮᒃᓴᖅᑕᖃᖅᐸᒡᓗᓂ, ᒥᕐᖑᐃᖅᓯᕕᖕᓂ ᐊᒻᒪ ᓄᓇᓕᖕᓂ ᐱᓕᕆᑎᑦᑎᕙᒡᓗᑎᒃ ᓄᓇᓕᖕᒥᐅᓄᑦ, ᐊᒻᒪᓗ ᐃᓕᓐᓂᐊᖅᑕᐅᔪᒃᓴᓂᒃ ᒪᒃᑯᒃᑐᓄᑦ.

ᑭᐱᙳᐃᔭᕐᓂᖅ:ᓄᓇᖓ ᑲᔾᔮᕐᓇᕐᓂᖓ ᓄᓇᕘᒥ ᒥᕐᖑᐃᖅᓯᕕᖕᓂ ᑕᑯᒃᓴᐅᑎᑦᑎᕗᖅ ᐳᓛᖅᑎᓂᒃ ᐊᒻᒪ ᓄᓇᖅᑲᑎᒌᓂᒃ. ᓄᓇᓕᖕᒥᐅᑦ ᐊᑐᐃᓐᓇᕐᓂᐊᖅᑐᑦ ᓄᓇᕗᒻᒥ ᒥᕐᖑᐃᖅᓯᕐᕕᖕᒥᑦ ᐊᕐᕌᒎᑉ ᐃᓚᐃᓐᓇᖓᓂᑦ ᐊᖑᓇᓱᖕᓂᕐᒧᑦ, ᖃᓱᖓᓂᕐᒧᑦ ᐊᒻᒪ ᓴᐃᓕᓂᕐᒧᑦ. ᐳᓚᕋᖅᑏᑦ ᐊᑐᕐᓂᐊᖅᐳᑦ ᑕᖕᒫᖅᓯᒪᓂᕐᒥᒃ, ᓯᓚᒥ ᓂᕆᖃᑎᒌᖕᓂᕐᒥᒃ ᐃᓂᒥᒡᓗ ᑕᑯᔭᖅᑐᕐᓂᕐᒥᒃ ᑕᕝᕙᓂ ᐊᑐᖅᑕᐅᕙᒃᑐᑐᖃᕕᓂᕆᔭᐅᕙᒃᑐᒥ ᑲᔾᔮᕐᓇᖅᑐᒥᓗ ᓄᓇᒥ. ᒥᕐᖑᐃᖅᓯᕐᕕᖕᓄᑦ ᒪᑭᒪᔾᔪᑎᑦ ᐃᖏᕐᕋᐃᓐᓇᕐᓂᐊᖅᐳᑦ ᖁᑦᑎᒃᑐᒦᓪᓗᑎᒃ ᖃᐅᔨᒪᔭᐅᖁᓪᓗᒋᑦ ᐊᑦᑕᕐᓇᖅᑕᐃᓕᒪᓂᖅ ᐊᒻᒪ ᖁᕕᐊᒋᔭᐅᓂᖓ ᒥᕐᖑᐃᖅᓯᕕᖕᒥ ᐊᑐᖅᐸᒃᑐᓕᒫᓄᑦ.

ᒪᑭᑕᐅᓗᓂ ᓄᓇᕗᒻᒥ ᒥᕐᖑᐃᖅᓯᕐᕕᒃ ᐊᑐᖅᑕᐅᓲᖑᕗᖅ ᐊᕐᕌᒍᒐᓴᕐᓄᑦ, ᑐᓴᕋᓱᖃᑦᑕᕐᓂᒃᑯᑦ ᐊᒻᒪ ᐃᓚᐅᑎᑦᑎᓂᒃᑯᑦ ᓄᓇᖅᑲᑎᒌᓂᒃ ᐊᒃᑐᖅᑕᐅᓯᒪᔪᓂᒃ ᓄᓇᓕᖕᓂ, ᐊᒻᒪ ᐊᑲᐅᓛᒃᑯᑦ ᐊᑐᐃᓐᓇᐅᔪᓄᑦ ᐱᖅᑯᓯᒃᑯᑦ, ᓄᓇᓕᖕᓂ ᐊᒻᒪ ᖃᐅᔨᓴᖅᑎᓂᒃ ᖃᐅᔨᒪᔭᐅᔪᓂᒃ. ᒥᕐᖑᐃᖅᓯᕐᕕᓕᐅᕐᓂᖅ ᑕᓪᓕᒪᐃᓕᖅᑲᖓᓪᓗᐊᑕᖅᐳᖅ. ᒫᓐᓇ ᐊᑐᖅᑕᐅᓪᓗᐊᑕᕐᓂᐊᖅᑐᓂᒃ ᐸᕐᓇᐅᑎᒦᑉᐳᒍᑦ ᒥᕐᖑᐃᖅᓯᕕᓕᐅᖅᐸᓪᓕᐊᑎᓪᓗᑕ ᑲᖏᖅᑐᒑᐱᖕᒥ. ᑕᓪᓕᒪᐅᓕᖅᑲᖓᔪᑦ ᐊᑐᖅᑕᐅᕙᓪᓕᐊᕙᒃᑐᑦ ᐋᖅᑭᒃᓯᒪᓕᖅᑎᑦᑎᓂᐊᕐᓗᓂ ᓄᑖᒥᒃ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ ᒥᕐᙳᐃᖅᓯᕐᕕᖕᒥᒃ ᐅᑯᐊᖑᕗᑦ:

1. ᐱᓕᕆᐊᖑᓯᒪᔪᑦ
2. ᐊᔪᖏᑦᑎᐊᕋᔭᕐᓂᖓᓄᑦ ᖃᐅᔨᓴᖅᑕᐅᔾᔪᑎ
3. ᒥᕐᖑᐃᖅᓯᕕᖕᒧᑦ ᐸᕐᓇᐅᑎᓪᓗᐊᑕᖅ
4. ᒥᕐᙳᐃᖅᓯᕐᕕᖕᒥᒃ ᐊᐅᓚᑦᑎᕝᕕᖃᕐᓂᕐᒧᑦ ᐱᕙᒌᔭᖅᑕᐅᓯᒪᔪᖅ ᐱᓕᕆᐊᖑᓂᖓ
5. ᐊᑐᓕᖅᑎᑕᐅᓂᑭᓐᓂᖏᑦ ᐊᐅᓚᓂᐅᔪᓐᓇᖅᑐᓪᓗ ᐊᑦᑕᕐᓇᕐᓂᖏᑦ