ᐅᕙᔪᖅ ᒥᕐᖑᐃᖅᓯᕐᕕᒃ

ᓄᓇᕗᒻᒥ ᒥᕐᖑᐃᖅᓯᕖᑦ ᐊᒻᒪ ᓄᓇᐃᑦ ᓴᐳᔾᔭᐅᓯᒪᔪᑦ ᐱᕈᖅᑐᓂᒃ ᖃᐅᔨᖃᑦᑕᖅᓯᒪᕗᑦ; ᑭᓯᐊᓂ ᐊᐅᓪᓚᕐᓂᖅ ᐅᖓᓯᒋᔭᐅᔪᒦᑦᑐᓄᑦ ᐊᑦᑕᕐᓇᕈᓐᓇᖅᑐᖅ. ᐳᓛᖅᑎᑦ ᑎᓕᐅᖅᑕᐅᕗᑦ ᖃᐅᔨᒪᖁᔭᐅᓪᓗᑎᒃ ᑖᒃᑯᓂᖓ ᖁᐊᖅᓵᕐᓇᖅᑐᓂᒃ ᐊᐅᓪᓚᓚᐅᙱᓐᓂᖏᓐᓂᒃ, ᐃᒻᒥᓂᒡᓗ ᐱᕙᒌᔭᑦᑎᐊᖅᐸᒡᓗᑎᒃ. ᐅᑭᐅᖅᑕᖅᑐᒥ ᐊᕙᑎᖓ ᐊᒃᑐᖅᑕᐅᓴᕋᐃᑦᑐᖅ ᐃᓄᖕᓄᑦ ᐸᒃᕕᓵᖅᑕᐅᓂᕐᒧᑦ ᒪᒥᑉᐸᓪᓕᐊᓂᕐᒧᓪᓗ ᓱᒃᑲᐃᑦᑐᒥᒃ. ᒥᒃᖠᒋᐊᖅᑎᓪᓗᒍ ᐊᒃᑐᐃᓂᕆᔭᑦ ᒥᕐᖑᐃᖅᓯᕐᕕᖕᒥ ᐊᕙᑎᖏᓐᓄᑦ, ᒪᓕᒡᓗᒋᑦ ᒥᕐᖑᐃᖅᓯᕐᕕᖕᒥ ᒪᓕᒋᐊᓕᑦ, ᐊᒻᒪ ᕿᒪᒃᓯᓇᓱᒡᓗᑎᑦ.

ᓄᒃᑕᕐᓂᖅ ᓄᓇᕗᒻᒥ ᐊᕕᒃᓯᒪᓂᕐᒥ ᒥᕐᙳᐃᖅᓯᕐᕕᖕᓄᑦ ᒪᓂᒪᑎᑦᑎᕙᒃᐳᖅ ᐃᓚᖏᓐᓂᒃ ᐊᓂᖅᓵᖅᑐᕐᓇᕐᓂᖅᐹᓂᒃ ᐆᒪᔪᓂᒡᓗ ᐃᓱᒪᑦᑎᐊᕐᓇᓛᓂᒃ, ᑭᓯᐊᓂᑦᑕᐅᖅ ᐃᓚᖃᕆᕗᖅ ᖁᐊᖅᓵᕐᓇᖅᑐᓂᒃ ᐊᒃᑐᐊᓂᓕᖕᓂᒃ ᓄᒃᑕᕐᓂᐊᕐᓗᓂ ᐅᐸᒃᓯᒪᔭᒥᓄᑦ ᐅᐸᒐᕐᓂᙱᑦᑐᒥ. ᐊᐅᓪᓚᕐᓂᐊᕐᑐᑦ ᑲᒪᑦᑎᐊᖁᔭᐅᕗᑦ ᓇᖕᒥᓂᖅ ᐊᑦᑕᖕᓇᖅᑕᐃᓕᒪᓂᖏᓐᓂᑦ. ᐱᕙᒌᔭᑦᑎᐊᖅᓯᒪᓗᑎᒃ ᖃᐅᔨᓴᕐᓗᑎᒡᓗ ᐃᓕᓐᓂᐊᖁᓪᓗᒋᑦ ᓄᓇᓕᖕᓂ ᓄᓇᐅᑉ ᑕᐅᑦᑐᐊᓂᒃ, ᓯᓚᒥ, ᐆᒪᔪᓂᒃ, ᐊᒻᒪ ᐊᑦᑕᕐᓇᑐᐃᓐᓇᕆᐊᓕᖕᓂᒃ ᐅᖃᐅᔾᔭᐅᕗᑦ. ᑎᒥᒃᑯᑦ ᖃᓄᐃᓕᖓᓂᖏᑦ ᒥᕐᖑᐃᕐᓯᕐᕕᖕᓂᑦ, ᐃᒪᖕᒥᑦ ᐊᖅᑯᑎᓂᒡᓗ ᐊᓯᔾᔨᑲᐅᖅᑐᕈᓐᓇᖅᖢᑎᒃ; ᓯᓚᐅᑉ ᖃᓄᐃᓐᓂᖓ ᐊᐅᓚᔾᔭᒍᓐᓇᖅᑐᖅ; ᐆᒪᔪᐃᓪᓗ ᑕᑯᒐᔪᒃᐸᒃᐳᑦ.

ᓄᓇᕐᔪᐊᕐᒥ ᑲᑎᒪᔩᑦ ᐊᕙᑎᓕᕆᓂᕐᒧᑦ ᐊᒻᒪ ᐱᕙᓪᓕᐊᑎᑦᑎᓂᕐᒧᑦ ᓇᓗᓇᐃᖅᓯᕗᑦ “ᑲᔪᓯᑎᑕᐅᔪᓐᓇᖅᑐᓂᒃ” ᓄᒃᑕᕐᓂᕐᒥᒃ ᐃᒪᓐᓇ “ᐱᔭᕆᐊᖃᖅᑕᖏᓐᓂᒃ ᓴᖅᑭᑦᑎᓪᓗᑎᒃ ᒫᓐᓇ ᐊᖏᖃᑎᒌᙱᖦᖢᑎᒃ ᑭᖑᕚᒃᓴᕗᑦ ᓇᖕᒥᓂᖅ ᐱᔭᕆᐊᖃᖅᑕᖏᓐᓂᒃ ᐊᖑᒻᒪᑎᖁᓪᓗᒋᑦ.” ᓄᓇᕐᔪᐊᕐᒥ ᐳᓚᕋᖅᑐᓕᕆᓂᕐᒧᑦ ᑲᑐᔾᔨᖃᑎᒌᑦ ᓇᓗᓇᐃᖅᓯᖕᒪᑕ ᑲᔪᓯᑎᑕᐅᔪᓐᓇᖅᑐᑦ ᓄᒃᑕᕐᓂᖅ “ᐊᐅᓚᑦᑎᓂᖅ ᑕᒪᐃᓐᓂᒃ ᐃᑲᔫᑎᒃᓴᓂᒃ ᓲᕐᓗ ᒪᑭᒪᔾᔪᑎᒃᓴᑦ, ᐃᓅᖃᑎᒌᑦ, ᐊᒻᒪ ᑕᑯᒥᓇᖅᑐᑦ ᐱᔭᐅᒋᐊᓕᑦ ᐱᓕᕆᐊᖑᔪᓐᓇᕐᓂᖏᓐᓂᒃ ᑲᔪᓯᑎᑦᑎᓗᑎᒡᓗ ᐃᓕᖅᑯᓯᕐᒧᑦ ᓱᓕᑦᑎᐊᕐᓂᕐᒥᒃ, ᐱᒻᒪᕆᐅᔪᓂᒃ ᐆᒪᔪᑦ ᓇᔪᒐᖏᓐᓂᒃ, ᐆᒪᔪᑦ ᐊᔾᔨᒌᙱᕈᓘᔭᖅᑐᑦ, ᐊᒻᒪ ᐃᓅᓯᕐᒧᑦ ᐃᑲᔪᖅᓱᐃᔾᔪᑎᑦ.”

ᐱᒻᒪᕆᐊᓗᐃᑦ, ᓈᒻᒪᓈᖅᑐᒃᑯᑦ ᑐᓴᖅᑕᐅᔪᒃᓴᓄᑦ ᐃᑲᔫᑎᑦ ᐊᑦᑕᕐᓇᙱᑦᑐᓄᑦ ᐊᒻᒪ ᑲᔪᓯᑎᑕᐅᔪᓐᓇᖅᑐᓄᑦ ᐊᐅᓪᓚᖅᐸᒃᑐᓄᑦ ᒥᕐᖑᐃᖅᓯᕕᑦᑎᓐᓂ ᐊᑐᐃᓐᓇᐅᕗᑦ ᒪᓕᒋᐊᓕᒃᑎᒍᑦ ᐊᒻᒪ ᑐᑭᓯᒋᐊᒐᒃᓴᒃᑯᑦ ᓴᖅᑭᑕᐅᓯᒪᔪᓂᒃ ᒥᕐᖑᐃᖅᓯᕕᑦᑎᓐᓂ; ᓄᓇᕗᑦ ᒐᕙᒪᒃᑯᑦ ᐃᑭᐊᖅᑭᕕᖓᒍᑦ ᐊᓯᖏᓪᓗ ᐱᔾᔪᑎᒃᓴᑦ ᒥᕐᖑᐃᖅᓯᕐᕕᑦᑎᓐᓂ ᓄᓇᓕᖕᓂ; ᓄᓇᓕᖕᓂ ᖃᐅᔨᒪᔨᑕᕐᓂᒃ, ᐊᖑᓇᓱᒃᑎᓂᒃ ᐊᓯᖏᓐᓂᒡᓗ ᓄᓇᓕᖕᓂᙶᖅᑐᓂᒃ; ᓇᑭᙶᕈᓘᔭᖅᑐᓂᒡᓗ ᐊᓯᖏᓐᓂᒃ ᑎᑎᖅᑲᙳᖅᑎᑕᐅᓯᒪᔪᓂᒃ ᐊᒻᒪ ᐃᑭᐊᖅᑭᕕᒃᑯᑦ ᐃᑲᔫᑎᒃᓴᓂᒃ. ᐳᓚᕋᖅᑏᑦ ᑎᓕᐅᖅᑕᐅᕗᑦ ᐅᖃᖃᑎᖃᖁᔭᐅᓪᓗᑎᒃ ᑕᒪᒃᑯᓂᖓ ᐊᑐᖅᑕᐅᔪᓐᓇᖅᑐᓂᒃ ᐃᒻᒥᓂᒃ ᑕᐃᒪᐃᓪᓚᕆᒍᒪᓂᕐᒧᑦ ᖁᐊᖅᓵᕐᓇᙱᑦᑐᒥᒃ ᐃᖅᑲᐅᒪᓇᖅᑐᒥᒡᓗ ᐊᑐᖃᑦᑕᖅᓯᒪᔭᒥᓂᒃ, ᓴᐳᔾᔨᓯᒪᔪᒪᓂᕐᒧᓪᓗ ᓄᓇᕗᒻᒥᐅᑦ ᐊᔾᔨᖃᙱᑦᑐᒥᒃ ᓄᓇᒥ ᐃᓕᖅᑯᓯᑐᖃᖏᓐᓂᒡᓗ.

ᐅᑭᐅᖅᑕᖅᑐᒥ ᐊᕙᑎᖓ ᐊᒃᑐᖅᑕᐅᓴᕋᐃᑦᑐᖅ ᐃᓄᖕᓄᑦ ᐸᒃᕕᓵᖅᑕᐅᓂᕐᒧᑦ ᒪᒥᑉᐸᓪᓕᐊᓂᕐᒧᓪᓗ ᓱᒃᑲᐃᑦᑐᒥᒃ. ᒥᒃᖠᒋᐊᖅᑎᓪᓗᒍ ᐊᒃᑑᑎᓂᖓ ᒥᕐᖑᐃᖅᓯᕐᕕᐅᑉ ᐊᕙᑎᖏᓐᓂ. ᐳᓛᕆᐊᖅᑐᑦ ᒪᓕᒋᐊᖃᖅᑎᑕᐅᕗᑦ ᒥᕐᙳᐃᖅᓯᕐᕕᐅᑉ ᒪᓕᒋᐊᖃᖅᐸᒃᑕᖏᓐᓂᒃ ᑎᓕᐅᖅᑕᐅᓪᓗᑎᒡᓗ ᕿᒪᐃᖁᔭᐅᓪᓗᑎᒃ.

ᒥᕐᙳᐃᖅᓯᕐᕕᒃ ᖁᕕᐊᒋᓗᒍ ᓄᓇ ᐃᒃᐱᒋᑦᑎᐊᕐᓗᒍ. ᒥᒃᖠᒋᐊᕐᓗᒍ ᐊᒃᑑᑎᓂᕆᔭᑦ ᒪᓕᒃᓗᒍ ᒥᕐᖑᐃᖅᓯᕐᕕᒃ ᒪᓕᒋᐊᖃᖅᑐᖁᑎᖏᑦ:

• ᐃᓄᐃᑦ ᐱᔪᓐᓇᐅᑎᖏᑦ ᐊᖑᓇᓱᖕᓂᐊᕐᓗᓂ, ᐃᖃᓗᒐᓱᒍᓐᓇᖅᖢᑎᒃ ᐊᒻᒪ ᐊᐅᓪᓛᖅᓯᒪᔪᓐᓇᖅᖢᑎᒃ ᒥᕐᖑᐃᖅᓯᕐᕕᖕᒥ ᓴᐳᔾᔭᐅᓯᒪᕗᑦ ᒪᓕᒐᖅᑎᒍᑦ. ᐅᓚᕕᓴᐃᑦᑕᐃᓕᒋᑦ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᒥᕐᖑᐃᖅᓯᕐᕕᖕᒥ ᐊᑐᖅᑕᐅᔾᔪᓯᕐᓂᒃ.
  ᑎᓴᒪᓖᑦ ᓄᓇᒥᒃ ᓱᕋᒃᑎᕆᕙᒃᐳᑦ. ᐊᖅᑯᑎᒃᑰᑐᐃᓐᓇᕐᓗᑎᑦ ᐊᒻᒪ ᓄᓇᒃᑰᕈᑎᓄᑦ ᓄᖅᑲᖓᕝᕕᖕᒦᑉᐸᒡᓗᓯ ᒥᕐᖑᐃᖅᓯᕐᕕᖕᒥ.
• ᐱᔪᓐᓇᐅᑎᑖᕈᑎᑦ ᐱᔭᕆᐊᖃᖅᑎᑕᑦ ᐃᓄᓪᓚᑦᑖᖑᙱᑦᑐᓄᑦ ᐊᐅᓪᓛᖅᑎᓄᑦ, ᓂᐅᕕᕐᓗᑎᑦ ᓚᐃᓴᓐᓯᖕᓂᑦ ᐆᒪᔪᕐᓂᐊᖅᑎᒃᑯᑦ ᑎᑎᕋᕐᕕᐊᓂᑦ, ᐊᕙᑎᓕᕆᔨᒃᑯᓐᓂᑦ ᐃᒪᕐᒥᐅᑕᓕᕆᔨᒃᑯᓐᓂᓪᓗ, ᑕᒪᐃᓐᓄᑲᓴᒃ ᐃᖃᓗᒐᓱᒡᕕᖕᓄᑦ, ᐱᙳᐊᕐᕕᖕᓄᑦ, ᐱᖁᑎᓄᑦ ᓂᐅᕕᕐᕕᖕᓄᑦ, ᐃᓚᖏᓐᓂᓪᓘᓐᓃᑦ ᑎᑎᕋᕐᕕᖕᓂᑦ ᐸᓖᓯᒃᑯᓐᓄᑦ.
• ᐃᒃᐱᒋᔭᖃᑦᑎᐊᕐᓗᓂ ᐆᒪᔪᓂᒃ ᐊᕙᑎᒥᒡᓗ. ᐆᒪᔪᓂᒃ ᐅᐸᒃᓯᑦᑕᐃᓕᒋᑦ ᖃᓄᑐᐃᓐᓇᖅ ᐱᔾᔪᑎᖃᕐᓗᑎᑦ. ᐅᔭᖅᑲᓂᒃ, ᐱᕈᖅᑐᓂᒃ, ᐊᓯᖏᓐᓂᒡᓗ ᓄᓇᒥᙶᖅᑐᓂᒃ ᐱᖁᑎᓂᒃ ᓇᓂᔭᕐᓂᒃ.
  ᐊᑦᑕᕐᓇᖅᑕᐃᓕᒪᓂᖅ ᓇᓄᖃᖅᑐᒦᓪᓗᓂ ᐱᕙᒌᔭᖅᓯᒪᓗᑎᑦ ᓇᓄᐃᑦ ᑎᑭᑦᑕᖅᑕᐅᓂᐊᕐᓂᖏᓐᓄᑦ. ᐅᔾᔨᖅᓱᑦᑎᐊᖏᓐᓇᕐᓗᑎᑦ, ᐊᐅᓪᓚᑲᑕᒡᓗᑎᑦ ᑲᑎᙵᓗᓯ ᐊᒻᒪ ᖃᐅᔨᒪᔾᔪᑎᒋᓂᐊᖅᑕᕐᓂᒃ. ᑕᖕᒫᕐᕕᒋᕙᒃᑕᐃᑦ ᓯᓚᒥᓗ ᓂᕆᕝᕕᒋᕙᒃᑕᐃᑦ ᓴᓗᒪᑏᓐᓇᕐᓗᒍ ᖃᖓᓕᒫᑦᑎᐊᒃᑯᑦ. ᐅᖃᐅᓯᕆᕙᒡᓗᓂᒋᑦ ᑕᑯᔭᐅᔪᑦ ᓄᓇᓕᖕᓂ ᐆᒪᔪᓕᕆᔨᒃᑯᑦ ᑎᑎᕋᕐᕕᖓᓄᑦ ᐊᒻᒪ ᓄᓇᕗᒻᒥ ᒥᕐᖑᐃᖅᓯᕐᕖᑦ ᐃᖅᑲᓇᐃᔭᖅᑎᖏᓐᓄᑦ.
  ᑕᖕᒫᖅᓯᒪᕝᕕᒃ ᐅᖓᓯᒋᒐᓗᐊᖅᖢᒍ ᐅᓪᓗᓕᒫᖅ ᐊᑐᖅᑕᐅᕙᖕᓂᖓᓄᑦ ᐃᓂᓂᒃ ᐱᕕᒃᓴᖃᖅᑎᑦᑎᔪᒪᓂᕐᒧᑦ ᐊᓯᖏᓐᓂᒃ ᒥᕐᙳᐃᖅᓯᕐᕕᖕᒧᑦ ᐳᓛᕆᐊᖅᐸᒃᑐᓂᒃ ᑖᒃᑯᓄᖓ ᐃᓂᓄᑦ.
• ᐃᒃᐱᒋᑦᑎᐊᕐᓗᒋᑦ ᐊᓯᖏᑦ ᒥᕐᖑᐃᖅᓯᕐᕕᖕᒥ ᐊᑐᖅᑏᑦ. ᓂᐱᖃᓗᐊᙱᓪᓗᒍ.
• ᐆᒪᔪᑦ ᑎᒍᐊᑦ ᐊᕐᔭᖏᓐᓃᑎᓪᓗᒋᑦ ᐊᐃᒃᖠᖅᐸᒃᓗᒋᓪᓗ ᑎᒍᐊᕆᔭᐅᔪᑦ ᐊᒃᑕᑯᖏᓐᓂᒃ.
• ᐊᒃᑕᑰᓯᕝᕖᑦ ᐃᒋᓪᓗᒋᑦ ᐅᕝᕙᓘᓐᓃᑦ ᐃᓕᖕᓄᑦ ᐲᕐᓗᒋᑦ.
• ᐊᓇᕐᕖᑦ ᐊᑐᖅᑕᐅᕙᒡᓗᑎᒃ ᒥᕐᖑᐃᖅᓯᕐᕕᖕᒥ, ᐅᕝᕙᓘᓐᓃᑦ ᒥᕐᖑᐃᖅᓯᕕᖕᓂ ᐊᓇᕐᕕᖃᙱᑦᑐᓂᒃ, ᐃᓄᐃᑦ ᐊᒃᑕᑯᖏᓐᓂᒃ.
• ᐃᑦᑕᕐᓂᓴᖃᕐᕖᑦ ᓴᐳᔾᔭᐅᓯᒪᔪᑦ ᒪᓕᒐᖅᑎᒍᑦ. ᐊᒃᑐᖅᑕᐃᓕᒃᑭᑦ ᐃᑦᑕᕐᓂᓴᖃᕐᕖᑦ ᐅᕝᕙᓘᓐᓃᑦ ᐃᑦᑕᕐᓂᓴᑦ. ᐅᓂᒃᑲᐅᓯᕆᓗᒋᑦ ᐃᑦᑕᕐᓂᓴᕕᓃᑦ ᓇᓂᔭᐅᔪᑦ ᓄᓇᕗᒻᒥ ᒥᕐᙳᐃᖅᓯᕐᕕᐅᑉ ᑎᑎᕋᕐᕕᖓᓄᑦ.

ᓄᓇᕗᑦ ᓇᓄᖃᕐᒪᑦ. ᐳᓛᕆᐊᕐᓂᕆᔭᐃᑦ ᖁᐊᖅᓵᕐᓇᙱᒃᑲᓗᐊᕐᒪᖔᑦ ᖁᕕᐊᓇᕐᓗᓂᓗ, ᐅᔾᔨᖅᓱᑦᑎᐊᖏᓐᓇᕐᓗᑎᑦ ᐊᕙᑎᒋᔭᕐᓄᑦ, ᐱᕙᒌᔭᕐᓗᑎᑦ ᐅᐸᖕᓂᐊᕐᓂᕆᔭᕐᓄᑦ ᐊᒻᒪᓗ ᐅᖃᐅᓯᕆᕙᒡᓗᓂᒋᑦ ᑕᑯᔭᐅᔪᑦ ᓄᓇᓕᖕᓂ ᐆᒪᔪᓕᕆᔨᒃᑯᑦ ᑎᑎᕋᕐᕕᖓᓄᑦ ᐊᒻᒪ ᓄᓇᕗᒻᒥ ᒥᕐᖑᐃᖅᓯᕐᕖᑦ ᐃᖅᑲᓇᐃᔭᖅᑎᖏᓐᓄᑦ.

ᓇᓄᐃᑦ ᑕᑯᔭᐅᔪᓐᓇᖅᑐᑦ ᓄᓇᕗᒻᒥ ᒥᕐᖑᐃᖅᓯᕐᕕᖏᓐᓂ. ᓇᓄᐃᑦ ᑕᑯᔭᐅᑐᐃᓐᓇᕆᐊᓖᑦ ᓇᒥᑐᐃᓐᓇᖅ ᑭᓯᐊᓂ ᓯᒡᔭᖅᐸᓯᖕᒦᒐᔪᓛᖑᔪᑦ. ᓇᐹᖅᑐᖃᙱᑦᑐᒥ ᐊᒃᖤᐃᑦ ᑕᑯᔭᐅᑐᐃᓐᓇᕆᐊᓖᑦ ᓄᓇᖅᐸᓯᒃᑐᒥ ᓄᓇᕗᒻᒥ. ᓄᓇᕗᒻᒥ ᒥᕐᖑᐃᖅᓯᕐᕕᓕᐊᕈᒪᒍᕕᑦ ᐊᑦᑕᕐᓇᖅᑐᒦᙱᓐᓂᖅᓴᐅᔪᓐᓇᖅᐳᑎᑦ ᓇᓄᕐᒧᑦ ᐅᐸᒃᓯᑲᑕᒡᓗᑎᑦ ᐅᔾᔨᖅᓱᑦᑎᐊᕐᓗᑎᑦ.

• ᐃᓕᖕᓂᒃ ᐃᓕᓐᓂᐊᕐᓗᑎᑦ ᐱᓱᒡᕕᒋᓂᐊᖅᑕᕐᓂᒃ.
• ᓄᓇᓕᖕᓂ ᖃᐅᔨᒪᔨᑕᖅᑖᕐᓗᑎᒃ ᖃᐅᔨᒪᔪᒥᒃ ᓇᓄᓕᕆᔪᓐᓇᕐᓂᕐᒥᒃ.
• ᐸᕐᓇᕙᒌᕐᓗᑎᑦ, ᐱᓕᒻᒪᒃᓴᕐᓗᑎᑦ ᐊᒻᒪ ᖃᐅᔨᒪᓗᑎᑦ ᖃᓄᐃᓕᐅᕆᐊᖃᕐᒪᖔᑦ ᐊᔾᔨᒌᖏᑦᑐᓂ ᓇᓄᕐᓂᑦ ᑕᑯᔪᖃᖅᑎᓪᓗᒍ.
• ᖃᐅᔨᒪᓗᑎᑦ ᓇᓂ ᓇᓄᐃᑦ ᓇᓂᔭᐅᔪᓐᓇᕐᒪᖔᑕ ᐊᕐᕌᒎᑉ ᐃᓗᐊᓂ. ᐅᐸᒃᐸᙱᓪᓗᒋᑦ ᑕᐃᒃᑯᐊ ᐊᕙᑎᖏᑦ ᐅᔾᔨᖅᓱᑦᑎᐊᕐᓗᑎᓪᓘᓐᓃᑦ ᐊᐅᓪᓚᓕᕌᖓᒥᒃ.
• ᖃᓂᒋᔭᐃᑦ ᐱᓕᕆᕝᕕᒋᔭᕐᓂᒃ ᐊᒻᒪᓗ ᐊᕙᑎᒋᔭᐃᑦ ᐅᔾᔨᕆᑦᑎᐊᕐᓗᒋᑦ ᒪᓂᕋᕐᒥᑦ, ᕿᙳᒻᒥᒐᐅᑎᓂᑦ ᐊᑐᕐᓗᑎᑦ ᓯᕗᒻᒧᑦ ᕿᓂᕐᓗᑎᑦ ᓇᓄᕐᓂᑦ. ᓇᓄᕐᒥᒃ ᐅᔾᔨᕈᓱᒃᑯᕕᑦ ᐅᖓᓯᒋᒐᓗᐊᕐᓗᒍ, ᐱᓕᕆᓗᑎᑦ ᑲᒪᓇᖁᙱᖦᖢᒍ.
• ᐊᐅᓪᓚᕐᓂᖅ ᐅᓪᓗᒃᑯᑦ ᐊᒻᒪ ᑕᑯᒃᓴᐅᕝᕕᐅᔪᑦ ᑕᑯᒃᓴᐅᑎᑦᑕᐃᓕᓗᒋᑦ.
• ᓇᐅᑦᑎᖅᓱᕐᓗᒋᑦ ᓇᓄᐃᑦ ᓇᓗᓇᐃᒃᑯᑕᖏᑦ ᓲᕐᓗ ᑐᒥᖏᑦ, ᑯᓯᖏᑦ, ᐅᓪᓗᒃᑯᑦ ᑎᓯᖏᑦ ᐅᕝᕙᓘᓐᓃᑦ ᓇᑦᑎᕕᓃᑦ.
• ᐅᐸᒃᓯᓚᐅᖅᓯᒪᙱᓪᓗᑎᑦ ᓄᑖᒥᒃ ᑐᖂᑦᑎᓂᕐᒥᒃ. ᓇᓄᕐᒥᒃ ᖃᓂᑦᑐᖃᑐᐃᓐᓇᕆᐊᓕᒃ.
• ᓂᖀᑦ ᐊᓂᖅᓵᖅᑐᑦᑎᐊᖅᐸᒃᓗᒋᑦ ᓇᓄᕐᒧᓪᓘᓐᓃᑦ ᐴᕆᔭᐅᓲᑦ ᓇᒃᓴᖅᐸᙱᓪᓗᒋᓪᓗ ᓂᕿᓂᒃ ᑎᑎᕋᖅᓯᒪᔪᓂᒃᓘᓐᓃᑦ ᓴᙱᔪᓂᒃ ᑎᐱᓕᖕᓂᒃ. ᐊᒃᑕᑯᓕᒫᑦ ᑕᖕᒫᕐᕕᖕᒧᐊᕐᓗᒋᑦ ᐃᒋᑦᑎᐊᕐᓗᒋᓪᓗ. ᐊᖅᑯᑎᒃᑯᑦ ᐃᒋᑕᐅᒥᐊᓲᑦ ᓇᓄᕐᒥᒃ ᐃᓕᖕᓄᑦ ᐅᕝᕙᓘᓐᓃᑦ ᐊᐅᓪᓛᕐᕕᒋᓂᐊᖅᑕᕐᓄᑦ.
• ᐃᓱᒪᒋᓗᒋᑦ ᓇᓄᕐᓄᑦ ᕿᒫᑎᑦᑎᔾᔪᑏᑦ ᓲᕐᓗ ᓂᐱᖃᐅᑎᑦ ᐸᐸᒧᓪᓘᓐᓃᑦ ᑎᖕᒥᑳᓲᑦ.
• ᐅᖃᐅᓯᕆᕙᒡᓗᓂᒋᑦ ᑕᑯᔭᐅᔪᑦ ᓄᓇᓕᖕᓂ ᐆᒪᔪᓕᕆᔨᒃᑯᑦ ᑎᑎᕋᕐᕕᖓᓄᑦ ᐊᒻᒪ ᓄᓇᕗᒻᒥ ᒥᕐᖑᐃᖅᓯᕐᕖᑦ ᐃᖅᑲᓇᐃᔭᖅᑎᖏᓐᓄᑦ.

ᓄᓇᕗᒻᒥ ᒥᕐᖑᐃᖅᓯᕐᕖᑦ ᓴᖅᑭᑦᑎᓚᐅᖅᓯᒪᕗᑦ “ᓇᓄᕐᓂᒃ ᐊᑦᑕᕐᓇᖅᑕᐃᓕᒪᓂᕐᒥᒃ ᓄᓇᕗᒻᒥ ᒥᕐᖑᐃᖅᓯᕕᖕᓂ”, ᒫᔾᔨ 2007-ᒥ ᓴᖅᑭᑦᑎᓪᓗᑎᒡᓗ ᑕᕐᕆᔮᒃᓴᒥᒃ “ᓇᓄᕐᓂᒃ: ᖃᐅᔨᒪᔾᔪᑎᒃᓴᑦ ᐊᑦᑕᕐᓇᖅᑕᐃᓕᒪᓂᕐᒧᑦ”, 27 ᒥᓂᑦᒥ ᑕᕐᕆᔮᒃᓴᖅ ᓴᖅᑭᑕᐅᔪᖅ ᐱᓕᕆᖃᑎᖃᖅᖢᑎᒃ ᒥᕐᖑᐃᖅᓯᕕᓕᕆᔨᒃᑯᑦ ᑲᓇᑕᒥ. ᑕᕐᕆᔮᒃᓴᖅ ᐃᓗᓕᖃᖅᑐᖅ ᐱᒻᒪᕆᐅᔪᓂᒃ ᓇᓗᓇᐃᔭᐅᑎᓂᒃ ᖃᓄᖅ ᐃᓄᐃᑦ ᒥᒃᖠᒋᐊᖅᑎᑦᑎᔪᓐᓇᕐᒪᖔᑕ ᐱᑐᐃᓐᓇᕆᐊᖃᕐᓂᖏᓐᓂ ᓇᓄᕐᓂ, ᖃᓄᕐᓗ ᐱᐅᓛᒃᑯᑦ ᑭᐅᔪᓐᓇᕐᒪᖔᑦ ᑲᑎᒍᑎᒃᐸᑕ ᓇᓄᕐᒥᒃ.

ᐃᓄᐃᑦ ᐱᔪᓐᓇᐅᑎᖏᑦ ᒥᕐᖑᐃᖅᓯᕐᕕᖕᓂ ᖁᕕᐊᒋᔭᖃᕈᓐᓇᕐᓗᑎᒃ ᐃᓚᐅᔪᓐᓇᕐᓗᑎᒡᓗ ᐱᐅᓯᑐᖃᒃᑯᑦ ᐱᓕᕆᐊᓂᒃ ᓴᐳᔾᔭᐅᓯᒪᕗᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒧᑦ ᐊᒻᒪ ᑕᒪᐃᓐᓄᑦ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪᓗ ᐊᖏᖃᑎᒌᒍᑎᒧᑦ ᓄᓇᕘᒥ ᒥᕐᖑᐃᖅᓯᕕᖕᓄᑦ ᓄᓇᕗᒻᒥ ᓄᓇᓂᒃ ᐊᕕᒃᑐᖅᓯᒪᔪᓂᒃ. ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ ᐊᒻᒪ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪᓗ ᐊᖏᖃᑎᒌᒍᑎ ᓴᐳᔾᔨᔾᔪᑕᐅᕗᖅ ᐃᓄᖕᓄᑦ ᐱᔪᓐᓇᐅᑎᒋᔭᐅᔪᓄᑦ ᓄᓇᕘᒥ ᒥᕐᖑᐃᖅᓯᕕᖕᓄᑦ ᐊᖑᓇᓱᒍᓐᓇᖅᓯᓗᑎᒃ. ᒥᕐᖑᐃᖅᓯᕐᕕᓕᐊᖅᑐᑦ ᑖᒃᑯᓂᖓ ᐱᔪᓐᓇᐅᑎᓂᒃ ᐃᒃᐱᒍᓱᑦᑎᐊᕆᐊᖃᖅᐳᑦ, ᐊᒻᒪ ᖃᓄᐃᓕᐅᕆᐊᖃᖅᖢᑎᒃ ᐸᒡᕕᓵᖅᑕᐃᓕᒪᓗᑎᒃ ᐅᕝᕙᓘᓐᓃᑦ ᐸᒡᕕᓴᐃᑦᑕᐃᓕᓗᑎᒃ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᐱᓕᕆᐊᓂᒃ.

ᐃᓄᐃᑦ ᐊᖑᓇᓱᒍᓐᓇᐅᑎᖏᑦ ᓄᓇᕗᒻᒥ ᒥᕐᖑᐃᖅᓯᕐᕕᒻᒥ ᓴᐳᑎᔭᐅᓯᒪᔪᑦ ᓄᓇᕗᒻᒥ ᐊᖏᕈᑎᒧᑦ (NA) ᐊᒻᒪᓗ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎ ᓄᓇᕗᒻᒥ ᒥᕐᖑᐃᖅᓯᕐᕕᓐᓄᑦ ᓄᓇᕗᒻᒥ ᓄᓇᓕᖃᕐᕕᐅᔪᓂᑦ (IIBA). ᐊᖑᓇᓱᓐᓂᖅ. ᓄᓇᕗᒻᒥ ᐊᖏᕈᑏᑦ ᐊᒻᒪᓗ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪᓗ ᐊᖏᖃᑎᒌᒍᑎᑦ ᓴᐳᔾᔨᓯᒪᕗᑦ ᐱᔪᓐᓇᐅᑎᖏᓐᓂᒃ ᐃᓄᐃᑦ ᓄᓇᒥᒃ ᐊᑐᖅᑕᐅᖏᓐᓇᕈᓐᓇᖁᓪᓗᒋᑦ ᐊᖑᓇᓱᖕᓂᕐᒧᑦ ᐱᓕᕆᐊᖑᕙᒃᑐᓄᑦ, ᓄᓇᓕᕋᓛᖃᕐᕕᖕᓄᑦ, ᐃᒡᓗᕋᓛᓄᑦ, ᓴᓇᙳᐊᒐᒃᓴᓄᑦ, ᐃᓯᕈᓐᓇᕐᓂᕐᒧᑦ, ᐊᓯᖏᓐᓄᓪᓗ ᐱᔾᔪᑕᐅᔪᓄᑦ ᑲᑕᓐᓂᓕᒃ ᒥᕐᙳᐃᖅᓯᕐᕕᖕᒥ.

ᐃᓄᐃᑦ ᐊᖑᓇᓱᒍᓯᖏᑦ (ᐊᖑᓇᓱᖕᓂᖅ, ᐃᖃᓗᒐᓱᖕᓂᖅ ᐊᒻᒪ ᑲᑎᓐᓂᐅᔪᑦ) ᐱᔪᓐᓇᖅᑎᑕᐅᕗᑦ ᐋᖅᑭᒃᑕᐅᓯᒪᔪᓂ ᓄᓇᕘᒥ ᒥᕐᖑᐃᖅᓯᕕᖕᓂ, ᐱᔪᓐᓇᖅᑎᑕᐅᖏᓐᓇᕐᓂᐊᖅᖢᑎᒡᓗ ᐃᓂᓂ ᓄᑖᒥ ᓄᓇᕗᒻᒥ ᒥᕐᖑᐃᖅᓯᕕᐅᓕᕋᔭᖅᑐᒥᒃ ᓯᕗᓂᒃᓴᑦᑎᓐᓂ.

ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ ᐊᒻᒪ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᓄᓪᓗ ᐊᖏᖃᑎᒌᒍᑎ ᑕᒪᕐᒥᒃ ᐱᔭᕆᐊᖃᕐᒪᑕ ᐃᓄᐃᑦ ᐊᒻᒪ ᓄᓇᕗᑦ ᒐᕙᒪᒃᑯᑦ ᑲᑐᔾᔨᖃᑎᒌᒡᓗᑎᒃ ᐸᕐᓇᐃᓗᑎᒃ ᐊᐅᓚᑦᑎᓗᑎᒡᓗ ᓄᓇᒥᒃ, ᐃᒪᕐᒥᒃ, ᐊᒻᒪ ᐱᔾᔪᑎᒃᓴᓂᒃ ᒥᕐᖑᐃᖅᓯᕕᖕᓂ. ᑲᑐᔾᔨᓪᓗᑎᒃ ᐸᕐᓇᐃᓂᖅ ᐊᐅᓚᑦᑎᓂᕐᓗ ᐱᓕᕆᐊᖑᕗᖅ ᒐᕙᒪᒃᑯᑦ, ᐃᓄᐃᑦ ᓄᓇᓖᓪᓗ ᐱᓕᕆᖃᑎᒌᒃᖢᑎᒃ ᐃᓱᒪᓕᐅᕆᓪᓗᑎᒃ ᐊᑐᓕᖅᑎᑦᑎᓪᓗᑎᒡᓗ ᐃᓱᒪᓕᐅᕈᑕᐅᔪᓂᒃ. ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓄᑦ ᐃᑲᔫᖅᑕᐅᔾᔪᑎᒃᓴᖏᓄᓪᓗ ᐊᖏᕈᑦ ᐋᖅᑭᒃᓯᔾᔪᑕᐅᓂᐊᖅᐳᖅ ᑲᑐᔾᔨᖃᑎᒌᒡᓗᑎᒃ ᐸᕐᓇᐃᓂᕐᒥᒃ ᐊᒻᒪ ᐊᐅᓚᑦᑎᓂᕐᒥᒃ ᐋᖅᑭᒃᓯᓪᓗᑎᒃ ᑐᙵᕕᒋᔭᐅᔪᓂᒃ ᐊᒻᒪ ᑎᑭᑕᐅᓇᓱᒃᑐᓂᒃ ᖃᐅᔨᒪᔭᐅᖁᓪᓗᒋᑦ ᑐᑭᖃᑦᑎᐊᖅᑐᑦ ᐃᓄᐃᑦ ᐃᓚᐅᓂᖏᑦ ᒥᕐᖑᐃᖅᓯᕕᖕᒥ ᐸᕐᓇᐃᔪᓂᒃ ᐊᒻᒪ ᐊᐅᓚᑦᑎᓂᕐᒧᑦ ᐃᓱᒪᓕᐅᕈᑎᒃᓴᓂᒃ, ᑕᒪᐃᓐᓂᒃ ᓄᓇᕘᒥ ᐊᒻᒪ ᓄᓇᓕᖕᓂ. ᓄᓇᕗᒻᒥ ᑲᑐᔾᔨᓪᓗᑎᒃ ᐸᕐᓇᐃᓂᕐᒧᑦ ᐊᐅᓚᑦᑎᓂᕐᒧᓪᓗ ᑲᑎᒪᔨᕋᓛᓄᑦ (NJPMC) ᐅᖃᐅᔾᔨᒋᐊᖅᑐᑦ ᓄᓇᕗᒻᒥ ᒥᕐᖑᐃᖅᓯᕐᕖᑦ ᐱᓕᕆᐊᖑᕙᓪᓕᐊᔪᒪᔪᓂᑦ (IIBA ᐃᓚᖓ 13.1.1), ᐊᒻᒪ ᓄᓇᓕᓐᓂᑦ ᑲᑐᔾᔨᓂᒃᑯᑦ ᐱᕙᒌᔭᖃᑎᒌᓐᓂᖅ ᐊᐅᓚᑦᑎᖃᑎᒌᓐᓂᕐᒧᑦ ᑲᑎᒪᔨᕋᓛᖏᑦ (CJPMC), ᐱᓕᕆᖃᑎᖃᖅᑐᑦ ᓄᓇᓕᑎᒍᑦ, ᐸᕐᓇᐃᓪᓗᑎ ᐊᒻᒪ ᐊᐅᓚᑦᑎᓪᓗᑎ ᒥᕐᖑᐃᓯᕐᕕᓂᑦ ᐃᓗᐊᓂ ᐊᒻᒪ ᖃᓂᒋᔭᖏᓐᓂ ᐊᑦᑐᖅᑕᐅᔪᑦ ᓄᓇᓕᒻᒥ (IIBA ᐃᓚᖓ 13.1.1 d).

ᐸᕐᓇᒃᑕᐅᔪᑦ ᐊᒻᒪ ᐊᐅᓚᑦᑎᔾᔪᑎᑦ ᒪᓕᒃᑕᐅᓪᓗᑎᒃ ᓄᓇᕗᒻᒥ ᒥᕐᖑᐃᖅᓯᕕᓕᕆᔨᓄᑦ ᖃᐅᔨᒪᔾᔪᑕᐅᓂᐊᖅᐳᑦ ᐃᓄᐃᑦ ᖃᐅᔨᒪᔭᑐᖃᖏᑦ (IQ) ᑐᓴᐅᒪᑎᑦᑎᓲᖑᓂᖏᓐᓂᒃ ᐃᓱᒪᓕᐅᕈᑕᐅᕙᓪᓕᐊᔪᓂᒃ, ᐊᒻᒪ ᐳᓛᕆᐊᖅᓯᒪᔪᑦ ᒥᕐᖑᐃᖅᓯᕐᕕᖕᒥ ᐊᑐᖅᑕᐅᓲᑦ, ᐊᒻᒪ ᒥᕐᖑᐃᖅᓯᕕᓕᕆᔪᑦ ᐱᓕᕆᐊᖏᑦ ᐱᕙᓪᓕᐊᑎᑕᐅᔪᓪᓘᓐᓃᑦ, ᓈᒻᒪᙱᓪᓕᐅᕈᑕᐅᙱᓪᓗᑎᒃ ᐃᓄᖕᓄᑦ ᐊᑐᖅᑕᐅᔾᔪᑎᓄᑦ ᐊᒻᒪ ᖁᕕᐊᒋᔭᐅᔪᓄᑦ ᒥᕐᖑᐃᖅᓯᕕᖕᓄᑦ.

ᐃᑦᑕᕐᓂᓴᖃᕐᕕᓕᒫᑦ ᓄᓇᕗᒻᒥ ᓴᐳᔾᔭᐅᓯᒪᕗᑦ ᓄᓇᕗᒻᒥ ᐃᑦᑕᕐᓂᓴᖃᕐᕕᖕᓂ ᐊᒻᒪ ᓂᕐᔪᑎᕕᓂᑐᖃᕕᓂᕐᓂᒃ ᒪᓕᒋᐊᓕᑦ ᒪᓕᒃᖢᒋᑦ, ᐊᔪᖅᑎᑦᑎᔪᑦ ᐱᔪᓐᓇᖅᑎᑕᐅᙱᖦᖢᑎᒃ ᐸᒡᕕᓴᒃᑕᐅᒋᐊᖃᙱᖦᖢᑎᒃ. ᓅᑉᐸᙱᓪᓗᒋᑦ ᐲᖅᑕᐃᓕᓗᒋᓪᓘᓐᓃᑦ ᐅᔭᖅᑲᑦ, ᓴᐅᓂᕕᓃᑦ, ᐱᖁᑎᑐᖃᕕᓃᓪᓗ, ᐅᖃᐅᓯᕆᕙᙱᓪᓗᒋᓪᓗ ᓄᑖᑦ ᐃᑦᑕᖕᓂᓴᖃᕐᕕᕕᓃᑦ ᓄᓇᕗᑦ ᒐᕙᒪᒃᑯᖏᓐᓄᑦ.

ᓴᐳᑎᔭᐅᓯᒪᓂᖏᑦ ᓄᓇᕗᒻᒥ ᐃᑦᑕᕐᓂᓴᐃᑦ ᐊᒻᒪ ᓂᕐᔪᑎᕕᓂᑐᖃᑦ ᐃᑦᑕᕐᓂᓴᑦ ᐱᒻᒪᕆᐅᓪᓗᓂ ᓯᕗᓪᓕᐅᔾᔭᐅᔭᕆᐊᖃᖅᐳᖅ ᓄᓇᕗᑦ ᒐᕙᒪᒃᑯᓐᓄᑦ, ᐊᒻᒪ ᑲᒪᒋᔭᒃᓴᖅ ᑲᑐᔾᔭᐅᓪᓗᓂ ᑲᓇᑕᒥ ᒐᕙᒪᒃᑯᓐᓄᑦ. ᒪᓕᒃᖢᒍ ᓄᓇᕗᒻᒥ ᐱᖁᔭᖅ, ᐊᑐᐊᒐᑦ ᓴᐳᒻᒦᓂᕐᒧᑦ, ᑲᒪᑦᑎᐊᕐᓂᕐᒧᑦ ᔭᒐᑎᑦᑎᑕᐃᓕᒪᓂᕐᒧᓪᓗ ᐃᑦᑕᕐᓂᓴᖃᕐᕕᖕᓂ ᐅᔭᕋᙳᖅᓯᒪᔪᓂᒃᓗ ᐃᓂᖏᓐᓂ ᐊᑐᐊᒐᖃᖅᑎᑕᐅᔪᑦ ᑕᐃᑰᓇ ᐱᔪᓐᓇᐅᑎᖃᖅᑎᑕᐅᓂᒃᑯᑦ ᓄᓇᕗᒻᒥ ᒐᕙᒪᒃᑯᑦ ᒥᓂᔅᑕᖓᑕ ᐃᓕᖅᑯᓯᓕᕆᔨᒃᑯᓐᓄᑦ (C&H); ᐊᒻᒪ ᖃᐅᔨᓴᕐᓂᖅ, ᐃᓯᕈᓐᓇᕐᓂᖅ, ᑎᑎᕋᖅᐸᓪᓕᐊᓂᖅ ᐊᒻᒪ ᖃᐅᔨᓴᕐᓂᖅ ᐃᑦᑕᕐᓂᓴᕕᓂᕐᓂᒃ ᐊᒻᒪ/ᐅᕝᕙᓘᓐᓃᑦ ᓂᕐᔪᑎᕕᓂᑐᖃᕕᓂᕐᓂᒃ ᐊᒻᒪ ᖃᕆᓴᐅᔭᒃᑯᑦ ᑐᖅᑯᖅᑐᐃᕖᑦ ᖃᐅᔨᓴᖅᑕᐅᔪᓐᓇᕆᐊᖃᕐᒪᑕ. ᓄᓇᕗᑦ ᒐᕙᒪᖓᑕ C&H−ᒋᔭᖓ ᐱᔭᕆᐊᖃᖅᐳᖅ ᓄᓇᕗᒻᒥ ᐃᑦᑕᕐᓂᓴᕐᓄᑦ ᐃᓂᒋᔭᐅᔪᓄᑦ ᑎᑎᕋᖅᓯᒪᔪᖁᑎᒋᔭᐅᔪᓄᑦ ᓚᐃᓴᒥᒃ ᕿᒥᕐᕈᐊᕐᓂᐊᕐᓗᓂ ᑭᖑᓂᑦᑎᓐᓂ ᑎᑎᕋᖅᑕᐅᓯᒪᔪᓂᒃ; ᐃᑦᑕᕐᓂᓴᓕᕆᓂᖅ ᐅᔭᕋᙳᖅᓯᒪᔪᓂᒃᓗ ᐱᔪᓐᓇᐅᑎᑦ (ᖁᕝᕙᓯᖕᓂᓕᒃ 1 ᐅᕝᕙᓘᓐᓃᑦ ᓇᓃᓐᓂᖓ 2) ᖃᐅᔨᓴᕐᓂᕐᒧᑦ ᐱᓕᕆᐊᒃᓴᓄᑦ ᐊᒻᒪ ᓈᓴᐃᓂᕐᒧᑦ ᓯᓚᒥ.

ᓇᓗᓇᐃᒃᑯᑕᓕᒃ 1 ᐱᔪᓐᓇᐅᑎᖃᖅᑎᑦᑎᕗᖅ ᑎᑎᕋᖅᑕᐅᔪᓐᓇᑐᐃᓐᓇᖅᑐᓂᒃ ᐃᑦᑕᕐᓂᓴᕕᓂᕐᓂᒃ ᐊᒻᒪ/ᐅᕝᕙᓘᓐᓃᑦ ᓂᕐᔪᑎᕕᓂᑐᖃᕕᓂᕐᓂᒃ, ᐅᑯᓂᖓᓗ ᓄᓇᙳᐊᓕᐅᕐᓗᑎᒃ, ᑎᑎᕋᖅᐸᓪᓕᐊᓗᑎᒃ ᐃᑦᑕᕐᓂᓴᖃᕐᕕᖕᒥ ᓇᒦᓐᓂᖏᓐᓂᒃ, ᐊᒻᒪ ᖃᔅᓯᐅᓂᖏᓐᓂᒃ, ᖃᓄᐃᑦᑑᓂᖏᓐᓂᒃ ᐊᒻᒪ ᓇᓃᓐᓂᖏᓐᓂᒃ ᐱᑕᖃᖅᑐᑦ. ᖁᕝᕙᓯᖕᓂᓕᒃ 1 ᐱᔪᓐᓇᐅᑎᑦ ᐱᕕᖃᕈᑕᐅᙱᑦᑐᑦ ᐊᕝᕗᐃᓂᕐᒥᒃ ᐱᖁᑎᑐᖃᕐᓂᑦ.

ᖁᑦᑎᖕᓂᓕᒃ 2 ᐱᔪᓐᓇᐅᑎ ᐱᔪᓐᓇᖅᑎᑦᑎᕗᖅ ᑎᑎᕋᖅᑕᐅᓂᖏᓐᓂᑦ ᐃᑦᑕᖕᓂᓴᕕᓂᖕᓂᑦ ᐊᒻᒪᓗ/ᐅᕝᕙᓘᓐᓃᑦ ᓂᕐᔪᑎᕕᓂᖕᓂᑦ ᓇᒡᕚᖅᓯᐅᕐᓗᑎᒃ ᐲᔭᖅᑕᐅᓗᑎᒡᓗ ᐱᖁᑎᑐᖃᐃᑦ ᐊᒻᒪᓗ/ᐅᕝᕙᓘᓐᓃᑦ ᖃᐅᔨᓴᒐᒃᓴᑦ. ᑖᒃᑯᐊ ᐱᔪᓐᓇᐅᑏᑦ ᑐᓂᔭᐅᑐᐃᓐᓇᓲᑦ ᐱᓕᕆᔨᒻᒪᕆᓐᓄᑦ ᐃᑦᑕᕐᓂᓴᓕᕆᔨᓄᑦ ᐊᒻᒪᓗ/ᐅᕝᕙᓘᓐᓃᑦ ᓴᐅᓂᕕᓂᑐᖃᓕᕆᔨᓄᑦ.

ᑐᑭᓯᒋᐊᒐᒃᓴᒃᑲᓐᓃᑦ ᓇᓂᔭᒃᓴᐅᔪᑦ C&H−ᑯᑦ ᐱᓕᕆᕝᕕᖏᑦᑕ ᖃᐅᔨᒪᔾᔪᑎᖏᓐᓂᒃ ᐱᓇᔪᒃᑐᓄᑦ ᐊᒻᒪ ᑎᒍᒥᐊᖅᑎᓄᑦ ᓄᓇᕗᒻᒥ ᐃᑦᑕᕐᓂᓴᓕᕆᓂᕐᒧᑦ ᐊᒻᒪ ᓂᕐᔪᑎᕕᓂᑐᖃᓕᕆᓂᕐᒧᑦ ᐱᔪᓐᓇᐅᑎᓂᒃ.

ᐃᓕᖅᑯᓯᓕᕆᔨᒃᑯᑦ ᐊᐅᓚᑦᑎᖃᑦᑕᕆᕗᑦ ᐃᓄᐃᑦ ᓴᐅᓂᕕᓂᖏᓐᓄᑦ ᐊᑐᐊᒐᕐᒥᒃ ᖃᐅᔨᒪᖁᓪᓗᒋᑦ ᐃᑦᑕᕐᓂᓴᕕᓂᕐᓂᒃ ᖃᐅᔨᓴᖅᑐᖃᕌᖓᑦ ᐅᕝᕙᓘᓐᓃᑦ ᖃᐅᔨᓴᖅᑕᐅᔪᓂᒃ ᐃᓄᐃᑦ ᓴᐅᓂᕕᓂᖏᓐᓂᒃ ᐅᕝᕙᓘᓐᓃᑦ ᐃᓗᕕᕐᓂᒃ ᐱᖁᑎᓂᒃ ᐱᓕᕆᐊᖑᖃᑦᑕᕐᓂᐊᖅᐳᑦ ᐃᒃᐱᒍᓱᑦᑎᐊᕐᓗᑎᒃ ᓄᓇᕗᒻᒥᐅᑦ ᐱᒻᒪᕆᐅᒋᔭᖏᓐᓂᒃ, ᐱᓇᓱᐊᑦᑎᐊᕐᓂᖏᓐᓂᒃ ᐊᒻᒪ ᖃᐅᔨᓴᖅᑎᑦ ᑐᙵᕕᖏᓐᓂᒃ, ᒪᓕᒡᓗᑎᒡᓗ ᒪᓕᒐᕐᓕᒫᓂᒃ, ᐱᓕᕆᔾᔪᓯᓄᑦ ᓇᓗᓇᐃᒃᑯᑕᓂᒃ, ᐊᒻᒪ ᑲᑎᒪᕐᔪᐊᖅᑐᓂᒃ.

ᐃᑦᑕᕐᓂᓴᖃᕐᕕᕕᓃᑦ ᐊᒻᒪ/ᐅᕝᕙᓘᓐᓃᑦ ᓂᕐᔪᑎᕕᓂᑐᖃᕕᓃᑦ ᓇᓂᔭᐅᒃᐸᑕ ᓄᓇᕗᒻᒥ ᒥᕐᖑᐃᖅᓯᕐᕕᖕᒥ, ᒪᓕᒋᐊᓕᑦ ᐊᒃᑐᕆᐊᖃᙱᑦᑐᑦ, ᓅᑦᑕᕆᐊᖃᙱᑦᑐᑦ ᐲᔭᖅᑕᐃᓕᓗᒋᑦᓘᓐᓃᑦ ᐅᔭᖅᑲᑦ, ᓴᐅᓃᑦ, ᐅᕝᕙᓘᓐᓃᑦ ᐱᖁᑎᑐᖃᐃᑦ, ᐅᖃᐅᓯᕆᑲᐅᑎᒋᓗᒋᓪᓗ ᓄᓇᕗᑦ ᒐᕙᒪᒃᑯᓐᓄᑦ ᓇᓂᔭᑦ.

ᐱᕙᓪᓕᐊᓂᖓ ᐃᑦᑕᕐᓂᓴᓕᒫᑦ ᓇᓂᔭᐅᔪᑦ ᑐᑭᓯᓇᑦᑎᐊᖅᑐᑦ; ᓇᓂᔭᐅᔪᑦ ᐅᖃᐅᓯᐅᔭᕆᐊᓖᑦ ᓄᓇᕗᒻᒥ ᐃᑦᑕᕐᓂᓴᓕᕆᔨᒃᑯᑦ ᑎᑎᕋᕐᕕᖓᓄᑦ, ᐃᓚᐅᓗᑎᒃ ᓇᓗᓇᐃᔭᖅᓯᒪᓂᓕᒫᖏᑦ, ᓲᕐᓗ:

• ᐊᑎᖓ ᐃᓅᑉ(ᖏᑦ) ᓇᓂᓯᔪᑦ ᐱᖁᑎᑐᖃᕐᓂᑦ
• ᐅᓪᓗᖅ ᓇᓂᔭᐅᑎᓪᓗᒍ
• ᓇᓂᔭᑦ (ᑕᒻᒪᕇᒃᑯᑏᑦ) ᐊᑐᐃᓐᓇᐅᒃᐸᑕ.
• ᐊᔾᔨᙳᐊᑦ ᐊᑐᐃᓐᓇᐅᒃᐸᑕ
• ᐊᓯᖏᑦ ᐊᑐᖅᑕᐅᕙᒃᑐᑦ ᑐᓴᒐᒃᓴᑦ

ᐃᓕᖅᑯᓯᓕᕆᔨᒃᑯᑦ ᐱᓕᕆᕝᕕᖓ ᑲᒪᒋᔭᖃᓕᕐᓂᐊᖅᐳᑦ ᐱᔾᔪᑕᐅᔪᒥᒃ ᐱᑎᑦᑎᓗᑎᒡᓗ ᖃᓄᐃᓕᐅᖁᔨᓂᕐᓂᒃ/ᐱᓕᕆᓂᕐᒥᒃ.

ᐃᓄᐃᑦ ᐱᖁᑎᖏᓐᓂᒃ ᓇᐅᑦᑎᖅᓱᖅᑎᑦ ᐱᖓᓱᓂᒃ ᑐᑭᓯᒋᐊᒐᒃᓴᖅᑕᖃᖅᐳᖅ ᐃᑦᑕᕐᓂᓴᓕᕆᓂᕐᒧᑦ ᓄᓇᕗᒻᒥ ᐊᑐᐃᓐᓇᐅᔪᓂᒃ ᖃᕋᓴᐅᔭᒃᑯᑦ(http://www.ihti.ca/eng/iht-proj-guide-booklets.html):

• ᐅᖃᓕᒫᒐᕋᓛᖅ ᐅᑭᐅᖅᑕᖅᑐᒥ ᓄᓇᓕᖕᓄᑦ;
• ᐅᖃᓕᒫᒐᖅ ᐅᑭᐅᖅᑕᖅᑐᒥ ᐃᑦᑕᕐᓂᓴᓕᕆᔨᓄᑦ;
• ᐅᖃᓕᒫᒐᕋᓛᖅ ᐅᑭᐅᖅᑕᖅᑐᒥ ᐃᓕᓐᓂᐊᖅᑎᓄᑦ.

ᒥᕐᖑᐃᖅᓯᕖᑦ ᒪᓂᒪᑎᑦᑎᕙᒃᐳᑦ ᐃᓗᑐᔪᒥᒃ ᐃᒃᐱᒋᔭᒃᑯᑦ ᐊᑕᓂᕆᔭᐅᔪᒥᒃ ᓄᓇᒧᑦ. ᑖᒃᑯᐊ ᐃᓂᐅᕗᑦ ᐃᒪᓐᓇ ᐅᖃᖅᖢᑎᒃ, “ᑲᔾᔮᖅᓇᖅ” − ᐃᓗᓕᕆᕙᕋ ᐅᕙᓂ ᑲᔾᔮᕐᓇᖅᑐᒻᒪᕆᐊᓗᖕᒥ ᐱᑐᐃᓐᓇᐅᙱᑦᑐᒥᓗ ᐃᓂᒥ, ᓇᓂᓯᓯᒪᕗᖓ ᓴᐃᓕᓂᕐᒥᒃ, ᐊᖏᕐᕋᖅᓯᒪᕗᖓ. ᑐᑭᓯᓂᐊᕐᓗᒋᑦ ᒥᕐᖑᐃᖅᓯᕐᕕᕗᑦ, ᖃᐅᔨᔭᕆᐊᖃᖅᑕᕗᑦ.
ᓈᓚᒋᐊᖃᖅᑕᕗᑦ ᓄᓇ.

ᓄᓇᕗᑦ, “ᓄᓇᕗᑦ”, ᓇᓗᓇᐃᖅᑕᐅᓯᒪᔪᖅ ᐃᓄᖏᓐᓄᑦ ᐊᒻᒪ ᓄᓇᖏᓐᓄᑦ. ᐅᑭᐅᖅᑕᖅᑐᖑᔪᖅ ᐊᔾᔨᖃᖅᑐᖅ ᐊᖏᔪᒥᑦ ᐃᓂᒥᑦ ᐊᒻᒪᓗ ᓯᐊᕐᕆᔭᐅᑎᑯᑖᓂᑦ, ᓄᓇᑐᐃᓐᓇᕐᒥᑦ, ᓯᑯᒥᑦ ᖃᖅᑲᓂᑦ, ᓄᓇᓂᑦ ᐊᒻᒪᓗ ᐃᒪᕐᓂᑦ ᐆᒪᔪᖃᖅᑐᓂᑦ, ᐊᒻᒪᓗ ᐃᓕᖅᑯᓯᑐᖃᖅᑕᖃᑦᑎᐊᖅᑐᑦ ᓱᓕ ᐊᑐᖅᑕᐅᕗᑦ ᐅᓪᓗᒥ.

“ᑲᔾᔮᕐᓇᖅ”, ᐃᒃᐱᒍᓱᖕᓂᐅᓪᓗᓂ, ᓴᖅᑭᑎᑦᑎᕗᖅ ᐃᓗᑐᔪᒥᒃ ᐃᒃᐱᒋᔭᐅᔪᒥᒃ ᐊᒃᑐᐊᓂᖃᕐᓂᕐᒥᒡᓗ ᑲᔾᔮᕐᓇᑦᑎᐊᖅᑐᒥᒃ ᐊᒻᒪ ᐅᔾᔨᕐᓇᑦᑎᐊᖅᑐᒥᒃ. ᖁᕕᐊᓇᖅᑑᓪᓗᓂ ᑭᑭᑕᐅᓂᖅ, ᐃᒪᓐᓇ ᑐᑭᖃᕈᓐᓇᖅᐳᖅ, “ᐆ, ᖃᓄᖅ ᐃᓂᑦᑎᐊᕙᒻᒪᕆᐊᓗᒃ!” ᑭᓯᐊᓂ ᐊᑐᖅᑕᐅᕙᒃᐳᖅ, ᐊᒃᑐᐊᓂᖃᖅᐳᖅ ᐊᕙᑎᑦᑕ ᐊᕙᑎᖏᓐᓄᑦ ᐊᒻᒪ ᓴᐃᓕᓂᕐᒥᒃ ᑐᑭᖏᓐᓂᒡᓗ. ᑭᓯᐊᓂ ᐊᑐᖅᑕᐅᕙᒃᐳᖅ, ᐊᒃᑐᐊᓂᖃᖅᐳᖅ ᐊᕙᑎᑦᑕ ᐊᕙᑎᖏᓐᓄᑦ ᐊᒻᒪ ᓴᐃᓕᓂᕐᒥᒃ ᑐᑭᖏᓐᓂᒡᓗ.

ᒥᕐᖑᐃᖅᓯᕕᓕᕆᔩᑦ ᐊᒻᒪ ᓄᓇᓂᒃ ᓴᐳᔾᔭᐅᓯᒪᔪᓕᕆᔩᑦ ᓄᓇᕗᑦ ᒐᕙᒪᒃᑯᓐᓂ ᐱᓕᕆᖃᑎᖃᖅᐳᑦ ᓄᓇᕗᒥᐅᓂᒃ ᓇᓗᓇᐃᖅᓯᓇᓱᒃᖢᑎᒃ ᓴᐳᔾᔨᓇᓱᒃᖢᑎᒡᓗ ᑖᒃᑯᓂᖓ ᐅᔾᔨᕐᓇᕐᓂᐅᔪᓂᒃ ᓄᓇᕘᒥ ᒥᕐᖑᐃᖅᓯᕕᖕᓂᒃ ᐊᒻᒪ ᓄᓇᓂᒃ ᓴᐳᔾᔭᐅᓯᒪᔪᓂᒃ, ᑐᑭᓯᐊᓗᒋᑦ ᑭᓱᕈᓗᐃᑦ ᐃᓄᖕᓄᑦ: ᕿᒫᕝᕕᐅᓲᑦ, ᐅᐸᒃᑕᐅᓲᑦ, ᐱᔪᓐᓇᕐᓂᖃᕐᕕᐅᓪᓗᑎᒃ, ᐊᒻᒪ ᖁᕕᐊᓲᑎᖃᓲᑦ ᐃᓕᖅᑯᓯᑦᑎᓐᓂ ᐊᒻᒪ ᓄᓇᒥᙶᖅᑐᓂᒃ.

ᐅᑭᐅᖅᑕᖅᑐᒥ, ᐃᓱᒪᒋᔭᐅᓂᖓ ᒥᕐᖑᐃᖅᓯᕐᕕᐅᑉ ᐅᕝᕙᓘᓐᓃᑦ ᓄᓇᐅᔪᖅ ᐊᔾᔨᒋᖏᒻᒪᒍ. ᐊᒃᑐᐊᓂᖃᕐᓂᖅᓴᐅᕗᖅ ᐆᒻᒪᖅᑯᑎᓄᑦ ᓄᓇᒥᓗ ᑲᔾᔮᕐᓇᕐᓂᖅᓴᐅᓪᓗᓂ ᑕᑯᒥᓇᕐᓂᖅᓴᐅᓪᓗᓂᓗ, ᖁᔭᒋᔭᐅᓪᓗᑎᒃ ᐊᔾᔨᒋᙱᑕᖓᒍᑦ. ᓄᓇᕗᒻᒥ, ᓄᓇᐃᑦ ᐊᖑᓇᓱᒡᕕᐅᓲᑦ ᐅᕝᕙᓘᓐᓃᑦ ᐃᖃᓗᒐᓱᒡᕕᐅᓲᑦ, ᐊᐅᓪᓛᕐᕕᐅᓲᑦ, ᐃᓄᐃᑦ ᑲᑎᕝᕕᐅᖃᑦᑕᖅᓯᒪᔪᑦ ᑭᖑᓂᖔᑦᑎᓐᓂ, ᐅᕝᕙᓘᓐᓃᑦ ᐅᔾᔨᕐᓇᑦᑎᐊᖅᑐᑦ.